假期返嚟開檔係有啲伏。最伏應該都係下個禮拜一。
～～～
今日有個女仔話佢想睇病。又係嗰句，你咁講冇錯嘅。病人係因為病而見醫生。正如天王黎爸爸話要空肚先食早餐。
OK，問佢想睇乜嘢。佢話覺得好攰，覺得係傷風感冒。當我諗住等佢再講埋其他病徵俾我聽嘅時候，原來成件事已經完咗。佢淨係得個攰字。
我日日都好攰。出面個個姑娘都好攰。由開始返工嘅途中，已經開始攰。學姑娘3話齋，唯有放工同瞓覺係最精神。
雖然而家仲係好多人傷風感冒，但係你乜嘢病徵都冇，我唔肯定你係唔係真係傷風感冒。攰可以好多原因。訓唔好，冇飲咖啡，琴晚飲咗好多酒，你張床褥唔啱，你搬咗10斤米，同男朋友嗌交嗌到凌晨四點等等，都可以攰。佢好似有啲愕然，堅持自己係傷風感冒。想攞啲感冒藥。
感冒藥你出面萬0買咪得囉。使乜專登入嚟睇醫生姐？我知我知，拎住張醫療咭入嚟免費攞藥呀嘛。我就係唔俾你。同埋都話我冇得肯定你係傷風感冒，點求其開藥呀？你又唔呃我。你話你有喉嚨痛有鼻水又咳咪得囉？ ！再唔係，過多幾日出多啲病徵先攞藥啦？預早食係冇預防作用架！要預防就打流感針啦！
我話我哋有傷風感冒嘅旅行平安包可以賣俾你，你要唔要？因為要自己比真金白銀，當然唔要啦。最後，佢話好多謝我嘅寶貴意見。之後我就趕/請咗佢出街。我係咪好快又收投訴信呀？😆
呢個故事教訓你，交啲戲好唔好？唔係慫恿你地呃醫生，不過總之唔好令到我好難做好唔好？我將醫療卷都唔知寫咩Diagnosis先Claim到錢呀喂？！
～～～
多謝騙子喺星加坡買比我食！講真麻麻哋。你加啲想像力，係有啲雞油味同埋有啲薑辣味。但係你話係海南雞飯就有啲失色同勉強。佢另外有Laksa味，我覺得佢只不過係有辣嘅嘢香味薯片。不試也罷。
Search